Obi-Martin er 16 ára gamall sóknarmaður sem fæddur er í Danmörku en hann kom til Arsenal þegar hann var aðeins 14 ára gamall.

Hann vakti athygli á síðustu leiktíð með U16 ára liði Arsenal er hann skoraði tíu mörk í 14-3 sigri á Liverpool og síðan sjö mörk í 9-0 sigri á Norwich með U18 ára liðinu.

Framherjinn var fenginn til að æfa með aðalliði Arsenal í nóvember og hefur haldið áfram að heilla með U17 ára landsliði Danmerkur en hann var valinn í lið mótsins á EM í síðasta mánuði.

Hann hefur einnig spilað fyrir U16 ára landslið Englands, en vegna ættartengsla á hann einnig möguleika á að spila fyrir Nígeríu.

ESPN segir þennan efnilega leikmann nú á leið til Manchester United. Hann hafnaði bæði Borussia Dortmund og Bayern München.

United gerði allt til að fá leikmanninn en hann skoðaði æfingasvæði félagsins í gær og fóru þjálfararnir Ruud van Nistelrooy og Steve McClaren með leikmanninn í sérstaka kynnisferð um svæðið.