Verona tók á móti Monza í eina leik kvöldsins í ítalska boltanum og var Dany Mota hetjan í leik sem var nokkuð jafn.

Mota skoraði fyrsta mark leiksins fyrir Monza á níundu mínútu, eftir undirbúning frá Gianluca Caprari, og tvöfaldaði forystuna í síðari hálfleik.

Hann skoraði á 74. mínútu eftir stoðsendingu frá Milan Djuric og fimm mínútum síðar var Alessandro Bianco mættur til að innsigla sigurinn.

Lokatölur urðu 0-3 fyrir Monza og var þetta fyrsti sigur liðsins á nýju deildartímabili.

Monza er með 7 stig eftir 8 fyrstu umferðirnar, á meðan Verona er með 9 stig.