Jóhann Berg Guðmundsson átti stóran þátt í frábærum 3-2 endurkomusigri Al Orubah á lærisveinum Steven Gerrard í Al Ettifaq í Sádi-Arabíu í kvöld.
Landsliðsmaðurinn var á sínum stað í byrjunarliði Al Orubah og tókst að jafna leikinn fyrir liðið á 74. mínútu með stórkostlegu marki eftir stoðsendingu Cristian Tello.
Jóhann Berg fékk boltann einhverjum 35 metrum frá marki, setti hann á vinstri og kíndi honum efst í samskeytin vinstra megin. Óverjandi fyrir markvörð Al Ettifaq.
Cristian Tello gerði síðan sigurmarkið tíu mínútum síðar og þar við sat.
Gudmundsson scored the equalizer goal for Al-Orobah ????
— All About SPL ???? ???????? (@Saudifutbol) October 20, 2024
pic.twitter.com/iZ7p8CFEzB
Al Orubah er komið upp í 10. sæti með 10 stig, upp að hlið Al Ettifaq.
Óvænt úrslit áttu sér þá stað í dönsku úrvalsdeildinni er nýliðar SönderjyskE unnu 3-2 sigur á meisturunum í Midtjylland.
Elías Rafn Ólafsson hefur átt betri daga í marki Midtjylland en hann fær 5,6 í einkunn á FotMob.
Daníel Leó Grétarsson, sem lék í vörninni hjá SönderjyskE, var með 6,4 í einkunn.
Kristall Máni Ingason var ekki með nýliðunum í dag. Midtjylland er í öðru sæti með 24 stig en SönderjyskE í 10. sæti með 11 stig.
Atli Barkarson var með bestu mönnum Zulte Waregem sem vann 1-0 sigur á Patro Eisden í belgísku B-deildinni.
Sigurinn kom Waregem á toppinn með 19 stig eftir átta leiki.
Lærisveinar Freys Alexanderssonar í Kortrijk töpuðu fyrir Mechelen, 3-0, í belgísku úrvalsdeildinni. Patrik Sigurður Gunnarsson var í marki Kortrijk, en fór meiddur af velli á 23. mínútu.
Kortrijk er í 13. sæti með 11 stig.
Júlíus Magnússon, fyrirliði Fredrikstad, lagði upp sigurmark liðsins í 2-1 sigrinum á Lilleström í norsku úrvalsdeildinni.
Staðan var 1-1 þegar tólf mínútur voru eftir en þá lagði Júlíus boltann á Jeppe Kjær sem keyrði inn að teig Lilleström, snéri af sér varnarmann og skoraði fallegt mark.
Fredrikstad er í 5. sæti deildarinnar með 43 stig þegar fimm umferðir eru eftir, en liðið er aðeins stigi frá Evrópusæti.
Athugasemdir