Harry Kane skoraði þrennu í síðari hálfleik er Bayern München vann Stuttgart, 4-0, í þýsku deildinni í kvöld.

Staðan var markalaus í hálfleik eftir fremur tíðindalitlan fyrri hálfleik en Bayern-vélin fór að malla í þeim síðari.

Kane skoraði með hörkuskoti fyrir utan teig á 57. mínútu, neðst í vinstra hornið og bætti hann þá við öðru þremur mínútum síðar eftir mikinn darraðadans í teignum.

Tíu mínútum fyrir leikslok fullkomnaði hann þrennu sína með skoti af stuttu færi eftir að Thomas Müller skaut boltanum í varnarmann og til Kane sem var ekki í neinum vandræðum með að skora.

Kingsley Coman rak síðasta naglann í kistu Stuttgart eftir sendingu frá Müller. Lokatölur 4-0 á Allianz-leikvanginum og er Bayern komið aftur á toppinn með 17 stig.

Kane er annar markahæstur í deildinni með 8 mörk en aðeins Omar Marmoush hefur skorað fleiri eða níu talsins. Marmoush er á mála hjá Eintracht Frankfurt.