David Beckham er einn af eigendum bandaríska fótboltafélagsins Inter Miami, sem er með argentínsku goðsögnina Lionel Messi innanborðs.
Messi hefur verið stórkostlegur á dvöl sinni hjá Inter og skoraði hann til að mynda þrennu í sigri liðsins í nótt. Beckham hefur gríðarlega miklar mætur á Messi, sem er enn í dag einn af bestu fótboltamönnum heims þrátt fyrir að vera orðinn 37 ára gamall.
„Messi er stórkostlegur leikmaður og einstaklingur. Ég man eftir fyrsta deginum þegar hann mætti á æfingu hjá okkur, þá var hann kominn á æfingasvæðið klukkan 06:50 en æfingin byrjaði ekki fyrr en klukkan 10," sagði Beckham.
„Restin af hópnum mætti ekki fyrr en þremur tímum síðar, en Messi var að hita upp á æfingasvæðinu. Hann var að leika sér og gera alla þessa hluti sem maður býst við af ungum leikmanni sem er hungraður í að bæta sig og ná árangri."
Athugasemdir