Vestri tapaði gegn KA á Akureyri í dag. Liðið á því enn á hættu að falla í lokaumferðinni. Vestri lenti undir eftir aðeins 25 sekúndna leik. Fótbolti.net ræddi við Davíð Smára Lamude, þjálfara Vestra eftir leikinn.
Lestu um leikinn: KA 2 - 1 Vestri
„Það var alvöru skellur, ekki bara markið líka frammistaðan okkar í fyrri hálfleik var algjörlega til skammar. Við unnum ekki návígi, héldum ekki í boltann, vorum kraftlitlir og langt frá mönnunum okkar. Það er eitthvað sem við þurfum að læra hratt af því við eigum gríðarlega erfiðan leik heima í síðustu umferð. Við þurfum að spila töluvert betur en þetta til að ná í þau úrslit sem við viljum úr þeim leik."
„Síðustu þrjátíu mínúturnar í leiknum fannst mér við öllu betri. Reyndum aðeins að hræra í þessu og breyttum í fjögurra manna línu og reyndum að ýta fleiri mönnum upp og spyrja KA liðið eitthvað af spurningum. Mér fannst við gera það en ég hefði viljað sjá meira."
Skilaboðin fyrir leikinn var að vinna návígin.
„Við vorum linir í fyrri hálfleik og þá spilaði KA liðið eins og þeir væru Barcelona árið 2009 og það er ekki boðlegt."
Gunnar Jónas Hauksson fékk að líta rauða spjaldið undir lok leiksins þegar hann fékk boltann í höndina.
„Ég held að það séu allir sammála um að það voru mistök hjá dómaranum. Hann hefur séð þetta eitthvað vitlaust held ég, boltinn fer af lærinu á Gunnari og upp í hendina á honum. Ég held að hann hafi ekki gert neina tilraun til að reyna fá boltann í hendina, ef honum tókst það þá er hann góður markmaður líka."