Gavi, sem er með efnilegustu miðjumönnum heims, meiddist í leik gegn Shakhtar Donetsk í Meistaradeildinni á síðasta ári.

Félagið staðfesti eftir leikinn að um krossbandsslit væri að ræða og tók því við langt endurhæfingarferli.

Miðjumaðurinn var mættur á bekkinn hjá Barcelona gegn Sevilla í gær og kom inn á þegar nokkrar mínútur voru til leiksloka, ellefu mánuðum eftir að hafa meiðst.

Pedri, sem var fyrirliði Barcelona í leiknum, setti fyrirliðabandið utan um handlegg Gavi er hann kom inn á, þó Gavi sé ekki í fyrirliðahóp félagsins.

Barcelona vann leikinn 5-1 og er sem stendur á toppnum með 27 stig, en liðið hefur skorað 33 mörk í tíu leikjum sínum á tímabilinu.