Lionel Messi skoraði þrennu er Inter Miami fór illa með New England Revolution, 6-2, í lokaumferð MLS-deildarinnar í nótt. Sigurinn færði Inter Miami sæti í HM félagsliða, sem fer fram næsta sumar.
Messi fór hamförum með argentínska landsliðinu í vikunni og fylgdi því síðan á eftir með annarri stjörnuframmistöðu.
Miami lenti tveimur mörkum undir en Luis Suarez jafnaði metin með tveimur mörkum á þremur mínútum.
Í síðari hálfleik kom Messi inn af bekknum á 58. mínútu, skoraði þrennu á ellefu mínútum og tryggði um leið sögulegt afrek, en ekkert lið í MLS-deildinni hefur fengið jafn mörg stig á einu tímabili. Inter Miami fékk 74 stig, sem er þremur meira en fyrra metið, sem var í eigu New England.
Þá var tilkynnt að Inter Miami mun taka sæti MLS-deildarinnar í HM félagsliða sem fer fram næsta sumar.
Messi skoraði 20 mörk og lagði upp 17 í deildinni á þessu tímabili, en hann var annar markahæsti leikmaðurinn þetta árið. Núna tekur við úrslitakeppni en úrslitaleikurinn fer fram í byrjun desember.
Dagur Dan Þórhallsson var í byrjunarliði Orlando City sem tapaði fyrir Atlanta City, 2-1. Orlando er þegar búið að tryggja sig áfram í úrslitakeppnina, en liðið hafnaði í 4. sæti Austur-deildarinnar.
Nökkvi Þeyr Þórisson kom inn af bekknum og spilaði síðustu tuttugu mínúturnar er St. Louis tapaði fyrir Minnesota United, 4-1, í Vestur-deildinni. St Louis hafnaði í 12. sæti með 37 stig en það dugði ekki til að komast í umspil.
THE BEST SEASON IN MLS HISTORY!!????????7??4??? pic.twitter.com/KCNVuBG9Qi
— Inter Miami CF (@InterMiamiCF) October 20, 2024
Athugasemdir