Raphael Varane, varnarmaður Manchester United, meiddist í gær í jafnteflisleiknum gegn Chelsea.
Varane hefur verið einn besti leikmaður Manchester United í vetur og hafa hann og Lisandro Martinez myndað saman ógnarsterkt miðvarðarpar.
Í ellefu leikjum saman höfðu þeir einungis fengið á sig sex mörk og haldið fimm sinnum hreinu. Í gær var staðan 0-0 þegar Varane meiddist í síðari hálfleiknum.
Franski landsliðsmaðurinn meiddist þegar hann reyndi að stoppa Pierre Emerick-Aubameyang og óttuðust margir það að meiðslin væru alvarleg. Varane lág lengi eftir og var í tárum þegar hann gekk af velli.
Fréttir frá Englandi í dag segja frá því að um vöðvameiðsli í læri sé að ræða og að Varane verði líklega frá í þrjár til fjórar vikur. Hann var reglulega meiddur í læri á síðustu leiktíð.
Þetta þýðir að hann mun ekki spila meira með Man Utd fram að HM í Katar en hann gæti hins vegar náð mótinu.
