Theodór Elmar Bjarnason
„Þetta var bara einstefna gjörsamlega í fyrri hálfleik og við eigum bara að vera búnir að setja tvö þrjú mörk á þá ef allt er eðlilegt. En svo fór ekki og þér er refsað ef þú nýtir ekki færin þín gegn sterkum liðum eins og Breiðablik.“ Sagði Theodór Elmar Bjarnason leikmaður KR um leik KR gegn Breiðablik í kvöld þar sem KR þurfti að sætta sig við 1-0 tap.
Lestu um leikinn: KR 0 - 1 Breiðablik
Leikurinn var hinn besta skemmtun þó aðeins eitt mark hafi verið skorað. Talsverður hiti var á vellinum sem og í stúkunni og menn tókust aðeins á.
„Maður vill spila á móti þeim bestu og Blikar eru í hópi bestu liðana og það er alltaf skemmtilegt að mæta þeim. En í dag getum við bara sjálfum okkur um kennt að hafa ekki tekið þrjú stig.“
KR skapaði sér nokkur álitleg marktækifæri í fyrri hálfeik en lítið var að frétta fram á við hjá þeim þegar kom að þeim síðari. Hver var munurinn þar á?
„Bara eins og þú sást ég held að það hafi voðalega lítið af færum skapast í seinni hálfleik. Bæði lið voru orðin þreytt, völlurinn er mjög þungur og við lendum undir á móti liði sem eru mjög flinkir að halda boltanum. Við áttum bara mjög erfitt með að stíga upp almennilega í pressuna vegna þreyttra leggja og þá verður þetta aðeins auðvelt fyrir þá að verjast okkur.“
Sagði Theodór en allt viðtalið má sjá hér að ofan.
Athugasemdir
