Kristian Nökkvi Hlynsson kom inn af bekknum á 66. mínútu er Ajax vann sannfærandi sigur gegn tyrkneska stórveldinu Besiktas í fyrstu umferð í nýrri deildarkeppni Evrópudeildarinnar í kvöld.
Staðan var orðin 3-0 fyrir Ajax þegar Kristian kom inná og urðu lokatölur 4-0 í leik þar sem heimamenn sýndu mikla yfirburði.
Hinn 19 ára gamli Mika Godts var atkvæðamestur með tvennu í sigrinum en Kian Fitz-Jim og Kenneth Taylor komust einnig á blað í sigrinum. Brian Brobbey og Bertrand Traoré áttu stoðsendingar.
Það fóru nokkrir leikir fram í kvöld en stærsti slagurinn var á milli AS Roma og Athletic Bilbao í Róm, þar sem heimamenn leiddu 1-0 í hálfleik en lokatölur urðu 1-1.
Artem Dovbyk tók forystuna fyrir Roma í fyrri hálfleik en Aitor Paredes jafnaði fyrir gestina á lokakaflanum.
Fyrrum Evrópudeildarmeistarar Eintracht Frankfurt gerðu þá 3-3 jafntefli á heimavelli gegn tékkneska félaginu Viktoria Plzen, þar sem tékknesku gestirnir voru tveimur mörkum undir allt þar til á 86. mínútu. Óvænt úrslit í Frankfurt.
Braga lagði þá Maccabi Tel Aviv að velli í Portúgal á meðan Lyon sigraði Olympiakos og Steaua Bucharest vann gegn RFS frá Lettlandi.
Viðureign Tottenham gegn Qarabag er enn í gangi, þar sem tíu leikmenn Tottenham leiða með þremur mörkum.
Athugasemdir
