Kylian Mbappé var í byrjunarliði Real Madrid og skoraði hann annað mark leiksins í sigri gegn Alavés í síðasta leik kvöldsins í efstu deild spænska boltans.

Lucas Vázquez gerði fyrsta mark leiksins eftir frábæran undirbúning frá Vinicius Junior og tvöfaldaði Mbappé forystuna á 40. mínútu eftir glæsilegt samspil við Jude Bellingham.

Brasilíski sóknarleikmaðurinn fjölhæfi Rodrygo Goes setti þriðja mark heimamanna snemma í síðari hálfleik og bjuggust stuðningsmenn Real við að þessi viðureign væri svo gott sem búin, en það var hún ekki.

Gestirnir í liði Alavés hættu aldrei að berjast og náðu að minnka muninn niður í eitt mark með tveimur mörkum á lokakaflanum, en tókst ekki að skora það þriðja. Carlos Benavidez skoraði fyrra markið og lagði það seinna upp en lokatölur urðu 3-2 fyrir heimamenn.

Þetta eru dýrmæt stig fyrir Real Madrid sem er með 17 stig eftir 7 umferðir, einu stigi á eftir toppliði Barcelona sem á leik til góða.

Alavés er um miðja deild með 10 stig, en sigur í kvöld hefði komið liðinu alla leið upp við hlið Athletic Bilbao í þriðja sætinu.