Ferill Jakobs er áhugaverður en Siglfirðingurinn fór í Þór í 3. flokki og steig þar sín fyrstu skref í meistaraflokki. Hann spilaði með meistaraflokki Þórs frá 2015 til 2021.

En árið 2021 var krafta hans ekki lengur óskað. Hann skipti svo yfir til nágrannana í KA.

„Það kom upp trúnaðarbrestur á milli mín og þjálfarans og á endanum varð það að samkomulagi að ég myndi yfirgefa félagið. Þegar mér bauðst svo að fara í KA ákvað ég að horfa bara á minn feril; ég er metnaðarfullur, leit á þetta sem rétta skrefið fyrir mig og er mjög spenntur. Ég hef aldrei spilað í efstu deild en tel mig geta bætt KA-liðið og gefið því styrk til að ná sínum markmiðum," sagði Jakob við Akureyri.net á þessum tíma.

„Ég er alls ekki fúll út í klúbbinn en hlutirnir þróuðust þannig að ég get ekki spilað fyrir þjálfarann og ég vona að fólk sýni þessu skilning."

Orri Freyr Hjaltalín var þjálfari Þórs á þessum tíma og sagði í kjölfarið: „Hann var bara ósáttur við sinn spilatíma og ég bauð honum að fara í annað lið sem hann gerði. Ég skil ekki alveg þennan trúnaðarbrest en það mál er bara gleymt og grafið. Hann óskaði okkur góðs gengis og ég honum. Það er engin fýla eða vesen í kringum þetta."

Þakklátur fyrir það tækifæri
Jakob sagði eftir bikarúrslitaleikinn að hann væri þakklátur fyrir tækifærið sem KA hefði gefið sér.

„Ég er þakklátur fyrir það tækifæri. Ég er búinn að fá að upplifa helling og stíga mikið upp. Ég held að þetta hafi verið flott fyrir mig. Ég er búinn að sýna hvað í mér býr síðan. Ég er ekki hættur," sagði Jakob sem er núna bikarmeistari með KA á meðan Þór endaði í tíunda sæti Lengjudeildarinnar.