Davíð Þór Viðarsson í leik með FH
Davíð Þór Viðarsson, fyrirliði FH í Pepsi-deild karla, var afar ósáttur með 1-1 jafntefli gegn Stjörnunni í kvöld. Hann var afar ósáttur með dómgæsluna undir lok leiks.
Lestu um leikinn: Stjarnan 1 - 1 FH
FH komst yfir undir lok fyrri hálfleiks er Alex Þór Hauksson kom boltanum í eigið net en það var dramatík undir lokin er Hólmbert Aron Friðjónsson jafnaði metin í uppbótartíma.
FH-ingum fannst brotið á Gunnari Nielsen í aðdraganda marksins auk þess sem Davíð fannst brotið á Cédric D'Ullivo.
„Það að missa þennan leik niður í jafntefli er það sem við erum ósáttir við og hvernig jöfnunarmarkið kom," sagði Davíð.
„Það var brotið fyrst á Cédric þegar hann hoppaði upp í skallaboltann. Hann tók hann næstum því úr treyjunni og svo fór Óli Kalli með sólann á undan sér í boltann með Gunna en samkvæmt mínum skilningi á knattspyrnureglunum er þetta aukaspyrna."
Stjörnumenn voru á þeirri skoðun að þeir hafi verið betri aðilinn í leiknum.
„Það er þeirra skoðun og ég hef ekkert um það að segja. Þetta var jafn leikur og þeir öflugri en við í fyrri hálfleik en við náðum inn þessu marki og það var ekkert í spilunum að þeir myndu jafna í seinni hálfleik er ekki bara sanngjarnt að þetta hafi farið jafntefli."
„Þetta er hrikalega svekkjandi við vorum ekki búnir að spila vel. Við vorum í Evrópuleik á fimmtudaginn og erfitt ferðalag á föstudaginn og vorum bara þéttir í seinni hálfleik. Þeir sköpuðu sér lítið af færum þá en mér fannst við gera nóg til að vinna leikinn en svekkjandi að fá mark á sig í uppbótartíma."
Valur er nú á toppnum með 37 stig, sjö stiga forystu á Stjörnunni sem er í öðru sæti. FH er svo með 25 stig í þriðja sæti, með tvo leiki til góða. Staða Vals er því afar góð fyrir lokaumferðirnar.
„Það hlýtur að vera. Þeir eru með mjög gott forskot á toppnum og þurfa að klúðra ansi miklu svo að titillinn fari ekki til þeirra," sagði hann ennfremur.
Mikil læti brutust út í leikslok þar sem Davíð reifst við Brynjar Björn Gunnarsson, sem er partur af þjálfarateymi Stjörnunnar, auk þess sem aðrir aðilar blönduðust inn í rifrildið. Pétur Viðarsson fékk rautt spjald þegar búið var að flauta leikinn af.
„Hann á að hafa tekið Brynjar Björn frá harkalega í einhverju rifrildi sem ég og Brynjar vorum í. Ég var sjálfur í þessum látum og tók ekkert eftir neinum öðrum, var bara að hugsa um sjálfan mig."
„Það var hiti í mönnum og menn voru ósáttir með hitt og þetta, var þetta ekki bara skemmtilegt fyrir áhorfendur."
„Þetta byrjaði á því að ég var óánægður með það að hann hefði ekki dæmt aukaspyrnu í aðdraganda að markinu og ég lét hann vita af því. Svo komu einhverjir Stjörnumenn aðallega þjálfarateymið hjá þeim og voru að láta mig heyra það og ég lét þá heyra það og úr varð þessi þvaga sem endaði með því að Pétur fékk rautt," sagði hann í lokin.
Stöðutaflan
| L | U | J | T | ms: | mf: | mun | Stig | ||
|---|---|---|---|---|---|---|---|---|---|
| 0 | 0 | 0 | 0 | 0 | 0 | 0 | 0 | 0 | |
Athugasemdir
