Sjö leikmenn í Bestu deild karla voru úrskurðaðir í bann í dag þar sem þeir hafa safnað fjórum gulum spjöldum.

Viktor Örn Margeirsson varnarmaður Breiðabliks tekur út leikbann þegar Blikar heimsækja Vestra á Ísafjörð á laugardag. Vestramenn verða án fyrirliða síns þar sem Elmar Atli Garðarsson tekur einnig út leikbann.

Á sama tíma leikur HK gegn ÍA á Akranesi og verður Kópavogsliðið án Arnþórs Ara Atlasonar, síns lykilmanns, vegna leikbanns.

Kristinn Freyr Sigurðsson miðjumaður Vals tekur út bann gegn Fylki á laugardaginn.

Birgir Baldvinsson verður í banni þegar KA heimsækir FH á mánudag. Birgir missir því af tveimur leikjum í röð en hann er einnig í banni í bikarleiknum gegn Val í kvöld.

Nikolaj Hansen fyrirliði Víkings verður í banni í næsta deildarleik sem verður ekki fyrr en 20. júlí (gegn KA) þar sem Íslandsmeistararnir eru á leið í Evrópuverkefni.

Þá verður Adam Örn Arnarson varnarmaður Fram í banni í næsta deildarleik þeirra bláu, gegn KR þann 11. júlí.