„Við höldum áfram frá síðasta leik að fá ódýr mörk á okkur, sem gerir það rosalega erfitt að vinna fótboltaleiki. Mjög klaufalegt fyrsta markið, svo erum við með boltann og stjórnum ferðinni í fyrri hálfleik en þeir eru alltaf skeinuhættir. Svo jöfnum við leikinn réttilega og vorum búnir að vera mjög flottir. Svo gefum við hornspyrnu og við búnir að fá einhverjar 10 hornspyrnur í fyrri og þeir skora úr því. Það er blóðugt svona rétt undir lok fyrri hálfleiks,'' sagði svekktur Arnar Grétarsson, þjálfari Vals, eftir 3-2 tap gegn KA í undanúrslitum Mjúlkurbikars karla í kvöld.
Lestu um leikinn: KA 3 - 2 Valur
„Svo fannst mér við koma ágætlega út. En þeir drápu leikinn og gerðu það vel. Tóku tíma í allt - menn voru alltaf niðri, alltaf eitthvað stopp og alltaf verið að kvarta og kveina. Þannig að leikurinn var svona frekar hægur. Mér fannst 20-25 mínúturnar í seinni, þá erum við að keyra á þá.''
Hann hélt áfram:
„En svo gerum við mistök. Man ekki hver það var, einhver er að senda boltann og þeir komast inn í sendingu og þeir refsa. 3-1, þá er þetta helvíti erfitt en við erum fljótir að minnka muninn og höldum áfram og fáum færi.''
Síðustu 10-15 mínútur leiksins fengu KA menn nokkur tækifæri til þess að klára leikinn algjörlega en mistókst það og þá er auðvitað alltaf möguleiki á dramatísku jöfnunarmarki.
„Þetta var orðið svolítið þannig að menn voru að henda miklu fram og KA fékk þrjú rosalega færi sem að hefðu auðvitað átt að stúta leiknum. En ef þú gefur ódýr mörk, það er ekki leið til árangurs í fótbolta og við gerðum það á móti Skaganum og gerum það aftur í kvöld og það kostar. Það er bara dýrt, það er bara þannig,'' sagði Arnar.
Viðtalið má sjá í heild sinni í spilaranum hér að ofan.
