Ralf Rangnick þjálfari austurríska landsliðsins var að vonum svekktur eftir að liðið féll úr leik á EM eftir tap gegn Tyrklandi í gær.
Merih Demiral skoraði bæði mörk Tyrklands í 2-1 sigri eftir hornspyrnu en Christoph Baumgartner skoraði mark Austurríkis einnig eftir hornspyrnu.
Mert Gunok markvörður Tyrklands átti stórkostlega vörslu í uppbótatíma sem gulltryggði Tyrkjum sigurinn. Rangnick hrósaði honum í hástert eftir leikinn.
„Við vorum ekki með heppnina með okkur. Ég trúi því að við hefðum unnið ef leikurinn hefði farið í framlengingu. Við fengum tækifæri til að jafna en það er erfitt þegar þeir eru með Gordon Banks í markinu," sagði Rangnick.
Gordon Banks er fyrrum landsliðsmarkvörður Englands en hann var í markinu þegar England vann HM 1966. Hann var sex sinnum valinn besti markvörður í heimi á sínum tíma.