„Mér liður bara nokkuð vel, gott að vinna og gott að spila aftur. Þetta var barátta í 90 mínútur. Sjúklega stolt af liðinu að klára þetta," sagði Andrea Marý leikmaður FH eftir sigur á Þór/KA í kvöld. Andrea snéri aftur á völlinn í dag eftir tveggja mánaða fjarveru.
Lestu um leikinn: Þór/KA 0 - 1 FH
Hún hneig niður í leik FH gegn Breiðabliki fyrir sléttum tveimur mánuðum síðan.
„Mér leið ágætlega. Ég var farin að þreytast í hálfleik. Síðan var ég tekin útaf sem var skynsamlegt, svo er það bara að halda áfram," sagði Andrea.
Andrea var hrædd um að hún myndi aldrei spila fótbolta aftur.
„Ég hélt að ég væri ekki að fara spila hér í dag, engan vegin. Ég er í pínu sjokki en ógeðslega gaman, það skemmtilegasta sem maður gerir, að fá að gera þetta aftur og halda áfram er geðveikt," sagði Andrea.
„Ég fer í aðgerð fyrir rúmum mánuði síðan og það gengur ágætlega. Ég fer að æfa tveimur vikum eftir það. Það gekk brösuglega fyrst. Ætli það séu ekki svona tvær vikur síðan ég sá fyrir mér að ég gæti haldið þessu áfram."
Þetta var ekki í fyrsta sinn sem þetta kemur fyrir hjá Andreu.
„Þetta var í fyrsta sinn sem ég var virkilega hrædd. Eins og Guðni talaði oft um í viðtölum þá hafði ég ekki stjórn á þessu þarna og það var mjög 'scary'. Það eru geggjaðir læknar sem eru búnir að hjálpa mér og þetta er allt á uppleið," sagði Andrea.
Hún er afar þakklát liðsfélögunum fyrir góðan stuðning.
„Ég er með systur minni í liði [Elísa Lana], hún náði að róa fólkið í kringum okkur og hjálpa mér. Þær vita allar af þessu, það voru allir þannig séð rólegir. Eftir á að hyggja var ég í smá sjokki en ég náði að fara daginn eftir eða tveimur dögum á eftir að hitta þær og það voru allir fegnir að sjá mann," sagði Andrea.
Sjáðu viðtalið í heild sinni í spilaranum hér fyrir ofan.
