Guðni Eiríksson þjálfari FH ræddi við Fótbolta.net eftir sigur liðsinis gegn Þór/KA í kvöld.
Lestu um leikinn: Þór/KA 0 - 1 FH
„Þær voru ótrúlega duglegar, börðust vel fyrir hvor aðra. Leikmenn lögðu sig virkilega fram. Þetta var flott frammistaða á erfiðum velli, það var erfitt að ná einhverju spili, það sást á báðum liðum að völlurinn er ekki upp á sitt besta," sagði Guðni.
„Mér fannst Þór/KA byrja sterkt. Þær lögðu línurnar þótt þær hafi ekki fengið svaka færi en samt var ákveðið 'power' í þeim sem við þurftum að jafna. Eftir 12 mínútur náum við því og þegar við náðum markinu fannst mér þetta aldrei spurning," sagði Guðni.
Ída Marín Hermannsdóttir var hetja liðsins en hún skoraði eina markið úr vítaspyrnu.
„Frábært víti hjá Ídu. Fast í hornið, hún er að sýna öðrum hvernig á að taka víti, það er nokkuð ljóst," sagði Guðni.
Thelma Lóa Hermannsdóttir, systir Ídu, hefði getað gert út um leikinn en klikkaði á tveimur dauðafærum undir lok leiksins.
„Hún var búin að hlaupa lungun úr sér, gersamlega búin, hún átti hreinlega ekkert eftir. Það sýnir samt karakterinn, áfram hélt hún og reyndi. Það sama má segja um fleiri leikmenn, hlaupatölur FH liðsins í dag voru hrikalega flottar, langt yfir meðaltali," sagði Guðni.
Andrea Marý Sigurjónsdóttir spilaði sinn fyrsta leik fyrir FH í tvo mánuði eftir að hafa hnigið niður í leik liðsins gegn Breiðabliki fyrir tveimur mánuðum síðan.
„Geggjað (að sjá hana aftur), gaman fyrir hana líka að sjá ljósið aftur, hún lifir fyrir þetta, það er frábært að hún fái mínútur í dag og hún skilaði sínu mjög vel," sagði Guðni.
Andrea virtist ósátt við að hafa verið tekin af velli en Guðni sagði að hann hafi verið að passa upp á hana.
