Það eru sögur á kreiki um að Barcelona sé að horfa til Mikel Arteta ef félagið fer í stjóraleit.
Fyrrum spænski landsliðsmaðurinn Xavi er í dag stjóri Barcelona en það hefur ekkert gengið sérlega vel hjá honum. Börsungar eru á eftir Real Madrid í deildinni og er liðið fallið úr leik í Meistaradeild Evrópu. Eftir áramót mun Barcelona taka þátt í Evrópudeildinni.
Ef vikið verður frá Xavi og hans hugmyndum, þá mun sjónin beinast að Arteta sem hefur verið að vinna flott starf með Arsenal á Englandi.
Arteta, sem er fertugur að aldri, steig sín fyrstu skref á fótboltaferli sínum með Barcelona og þekkir félagið mjög vel.
Arsenal er sem stendur á toppi ensku úrvalsdeildarinnar og hefur Arteta fengið mikið hrós fyrir starf sitt hjá Lundúnafélaginu en hann segist vera mjög ánægður hjá Arsenal. Hann svaraði fyrir þennan orðróm á fréttamannafundi í dag.
„Ég er gríðarlega ánægður og stoltur af þeim stað sem ég er á í dag," sagði Arteta við fréttamenn. „Barcelona er með stórgóðan þjálfara sem er algjör goðsögn. Þeir eru á góðri leið."
Athugasemdir