Antonio Conte stjóri Tottenham vill styrkja hópinn en ansi fáir sóknarmöguleikar eru í boði.
Richarlison og Dejan Kulusevski eru báðir fjarverandi og þá er ansi þunnskipað í sóknarleik liðsins. Liðið hafði aðeins Ryan Sessegnon og Emerson Royal á bekknum í tapinu gegn Aston Villa sem gátu komið inn á og breytt einhverju sóknarlega.
Sama er upp á teningnum í kvöld þar sem liðið er að spila gegn Crystal Palace. Sex af átta varamönnum liðsins eru varnarmenn.
Jamie Redknapp fyrrum leikmaður Tottenham varar Conte við því að byðja Daniel Levy um meiri pening til leikmannakaupa.
„Eins og Tottenham virkar þá er það þannig að um leið og þú ferð að biðja um meiri pening fer það ekki á besta veg," sagði Redknapp.
„Hann er búinn að eyða peningum í nokkra mjög góða leikmenn. Ég held að hann vilji bara bæta við breiddina."
