Þýski miðillinn Bild telur Ísak Bergmann Jóhannesson vera besta leikmanninn í liði Fortuna Düsseldorf sem er í toppbaráttu í næstefstu deild í Þýskalandi.
Ísak er lykilmaður í liði Düsseldorf og hefur komið að 13 mörkum hingað til á tímabilinu. Auk þess að vera frábær fótboltamaður er talað um Ísak sem mikinn leiðtoga í búningsklefanum.
Ísak er aðeins 21 árs gamall en Bild telur að hann sé að verða alltof góður fyrir Düsseldorf. Hann gæti þurft að skipta um félag til að taka næsta skref á ferlinum.
Düsseldorf keypti Ísak frá FC Kaupmannahöfn í fyrra og er hann eftirsóttur af ýmsum félagsliðum í sterkustu deildum Evrópu í dag, en Ísak á fjögur ár eftir af samningi í Düsseldorf.
Ísak skoðaði sig gaumgæfilega um og valdi Düsseldorf framyfir lið úr ítölsku Serie A deildinni og efstu deildum í Skandinavíu þegar hann var seldur frá Kaupmannahöfn.
Miðjumaðurinn knái getur þó skipt um félag um leið og nægilega gott tilboð berst í hann. Talað er um að riftunarákvæði í samningi Ísaks hljóði aðeins upp á 5,5 milljónir evra (800 milljónir isk). Hann mun kosta 7,5 milljónir (1,1 milljarður isk) ef Düsseldorf fer upp um deild.
Ísak er 21 árs gamall miðjumaður með 4 mörk í 32 A-landsleikjum fyrir Íslands hönd.
Athugasemdir
