Viðar Ari Jónsson.
Viðar Ari Jónsson er á leið til Ungverjalands samkvæmt heimildum Fótbolta.net.
Viðar Ari var stórkostlegur á síðasta ári með Sandefjord í Noregi og má með sanni segja að hann hafi slegið í gegn sem kantmaður, eftir að hafa áður leikið lengi vel sem bakvörður.
Viðar varð samningslaus eftir tímabilið 2021. Hann gat því samið við annað félag og var talsverður áhugi á honum.
„Ég myndi fyrst og fremst vilja fara og prófa eitthvað annað. Ég er búinn að vera í fjögur ár í Noregi og myndi segja að ég sé kominn á vissa endastöð í norska boltanum. Ég er búinn að spila oft á þessum völlum og farinn að þekkja alltof marga hérna - orðið eins og í Pepsi-deildinni heima. Ég myndi gjarnan vilja, ef tækifærið kæmi, fara út fyrir Noreg og draumurinn væri að fara eitthvað inn í Evrópu. Ef ekki, þá skoðar maður önnur félög í Skandinavíu eða hvað sem kemur upp," sagði Viðar við Fótbolta.net í nóvember.
Hann hefur núna tekið ákvörðun um að fara til Ungverjalands. Hann mun fara í læknisskoðun á mánudag og skrifar svo í kjölfarið undir eins og hálfs árs samning með möguleika á eins árs framlengingu ef félagið vill það.
Sparkspekingurinn Hjörvar Hafliðason nafngreinir félagið á Twitter. Hann segir að um sé að ræða Honvéd FC í höfuðborginni, Búdapest. Honvéd er í tíunda sæti af tólf liðum í ungversku úrvalsdeildinni.
Iceland International Viðar Ari Jónsson markahæsti og besti leikmaður Sandefjord er genginn til liðs við Honvéd FC í Búdapest. Flaug til Ungverjalands í dag.
— Hjörvar Hafliðason (@hjorvarhaflida) February 12, 2022
Athugasemdir
