Elías Már Ómarsson er fastamaður í liði Breda sem vann sér sæti í deildina fyrir þetta tímabil og þá gekk Kolbeinn Birgir Finnsson í raðir Utrecht á dögunum.

Kolbeinn sat allan tímann á varamannabekk Utrecht í dag á meðan Elías byrjaði hjá Breda áður en honum var skipt af velli á 68. mínútu.

Breda komst yfir á 37. mínútu leiksins en fékk jöfnunarmark í andlitið á fyrstu mínútu í uppbótartíma síðari hálfleiks. Lars Mol, 19 ára leikmaður Breda, fékk að líta rauða spjaldið þremur mínútum síðar áður en Ohio gerði dramatískt sigurmark Utrecht á lokasekúndum leiksins.

Utrecht fer upp í annað sæti deildarinnar með 7 stig en Breda er í 11. sæti með 3 stig.

Birkir Bjarnason, leikjahæsti leikmaður í sögu íslenska karlalandsliðsins, spilaði síðustu tuttugu mínúturnar fyrir Brescia sem tapaði fyrir Cittadella, 1-0, í B-deildinni á Ítalíu. Brescia er með þrjú stig eftir tvo leiki.