„Það eru engin ný meiðsli. Ég held að við munum sjá á æfingu í dag að Niclas Füllkrug sé orðinn betri. Hann æfði í gær og gerir það aftur í dag. Svo sjáum við til hvernig hann lítur út fyrir leikinn á morgun," sagði Julen Lopetegui, stjóri West Ham, á fréttamannafundi í dag.

Leikur Liverpool og West Ham hefst klukkan 19:00 og fer fram á Anfield annað kvöld. Liverpool er ríkjandi deildabikarmeistari.

Füllkrug var keyptur til West Ham frá Dortmund í sumar. Þýski framherjinn hefur spilað fjóra leiki með West Ham á tímabilinu og eini byrjunarliðsleikurinn var í 1-0 sigri gegn Bournemouth í 2. umferð deildabikarsins.

Hann skoraði í sigri Þýskalands gegn Ungverjalandi þann 7. september en fór af velli í þeim leik og tók ekki þátt í leiknum gegn Hollandi þremur dögum síðar.