Tveimur síðustu Íslendingaleikjum kvöldsins er lokið, þar sem Júlíus Magnússon bar fyrirliðabandið og lagði upp í 3-2 sigri Fredrikstad gegn Viking í Evrópubaráttu norska boltans.
Liðin mættust í efstu deild í Noregi og komst Fredrikstad í þriggja marka forystu eftir tæplega klukkutíma leik. Júlíus lagði annað mark leiksins upp.
Heimamenn í liði Fredrikstad nýttu færin sín betur, en gestirnir sóttu gríðarlega stíft og fengu urmul færa þó að færanýtingin hafi ekki verið nægilega góð.
Viking tókst að minnka muninn niður í eitt mark á lokakaflanum og voru síðustu mínútur leiksins afar spennandi, en jöfnunarmarkið kom aldrei. Lokatölur urðu því 3-2 fyrir Fredrikstad, sem á möguleika á því að næla sér í Evrópusæti.
Fjögur efstu lið deildarinnar fara í Evrópukeppni á næsta ári og situr Viking í fjórða sæti sem stendur, með 40 stig eftir 23 umferðir.
Fredrikstad og Rosenborg fylgja þremur stigum þar á eftir þegar sjö umferðir eru eftir af deildartímabilinu.
Þá gerði Kortrijk 1-1 jafntefli á útivelli gegn OH Leuven í efstu deild belgíska boltans.
Freyr Alexandersson þjálfar Kortrijk og er Patrik Sigurður Gunnarsson aðalmarkvörður liðsins.
Kortrijk er komið með 8 stig eftir 8 fyrstu umferðirnar á nýju deildartímabili.
Fredrikstad 3 - 2 Viking
Leuven 1 - 1 Kortrijk
Athugasemdir