Glen Johnson, fyrrum leikmaður Liverpool, telur að það sé heillandi tilhugsun fyrir Alexander-Arnold að fara til Real Madrid og þar sé leikmaður sem gæti hjálpað mikið til við að sannfæra hann.

„Félagið sjálft hefur rosalega mikið aðdráttarafl en ef hann talar við Jude (Bellingham) og hann segir honum hversu frábært þetta er, þá gæti það auðveldað honum að taka lokaákvörðun," segir Johnson.

„Við vitum það alveg að ef Real Madrid hringir, þá vilja flestir leikmenn fara þangað. Jude gæti verið síðasta púslið fyrir Trent að taka ákvörðun sína."

Bellingham er ein stærsta stjarna Real Madrid en hann og Alexander-Arnold eru góðir vinir úr enska landsliðinu.