Viðar samdi mjög óvænt við KA skömmu fyrir mót og var lengi í gang. Hann hefur sjálfur viðurkennt að hann glímdi við meiðsli og hefði ekki átt að spila fótbolta á þeim tímapunkti. En eftir landsleikjahléið í júní fór hann að byrja og stuttu síðar fór hann að skora.

Viðar fékk nokkuð mikla gagnrýni í byrjun sumars en hann kveðst vera með sterkan haus.

„Þetta er búið að líta frábærlega út í tvo mánuði. Ég ætla að gefa allt í síðustu fimm leikina og svo sjáum við til. Þetta er geggjaður hópur og allir eiga skilið fáránlega mikið hrós fyrir að hafa náð að snúa þessu við," sagði Viðar.

„Það er ekki létt þegar þú ert með fimm stig eftir tíu leiki."

Viðar sagði í viðtalinu að hann hefði ekki pælt í því hvort að hann verði áfram hjá KA eftir tímabilið.