Axel Óskar Andrésson varnarmaður KR var ekki með liðinu gegn Vestra í gær. Hann og Birgir Steinn Styrmisson meiddust báðir á æfingu liðsins á föstudag.
Lestu um leikinn: KR 2 - 2 Vestri
„Þeir meiddust báðir á æfingu á föstudaginn, meiddust báðir á nára þegar við fórum út á Starhaga að æfa þar. Það verður að koma í ljós hversu lengi þeir verða frá. Þeir gætu verið frá út tímabilið en gætu líka verið klárir eftir landsleikjahlé," sagði Óskar Hrafn Þorvaldsson þjálfari KR eftir 2-2 jafnteflið gegn Vestra í gær.
„Það er ekkert sérstakt að missa tvo varnarmenn á einum eftirmiðdegi."
Tímabilinu lokið hjá Guðmundi Andra og Stefáni Árna
KR er þremur stigum fyrir ofan fallsæti og mikilvægir leikir framundan. Óskar staðfesti þá í viðtali eftir leikinn að sóknarleikmennirnir Guðmundur Andri Tryggvason og Stefán Árni Geirsson verða báðir frá út tímabilið.
Guðmundur Andri hefur ekki spilað síðan hann kom frá Val í sumarglugganum. Stefán Árni tognaði illa aftan í læri í leik gegn KA í lok júlí.
Athugasemdir