Lestu um leikinn: Fram 2 -  0 Fylkir

„Mér fannst þessi stóri og stæðilegi sóknarmaður frábær, hann snéri af sér Fylkismenn eins og þeir væru skólataska á bakinu á honum trekk í trekk, hélt boltanum vel og skapaði mikla hættu. Besti leikur sem ég hef séð hann spila fyrir Fram," skrifaði Baldvin Borgarsson fréttamaður Fótbolta.net í skýrslu um leikinn.

Rúnar Kristinsson, þjálfari Fram, var spurður út í frammistöðu Daniels eftir leikinn.

„Það tók hann smá tíma að koma sér í gott stand. Hann var ekki í góðu formi þegar hann kom. Hann hefur vaxið og æft ágætlega. Hann þarf að spila meira fyrir liðið en sjálfan sig og gerði það í dag. Hann lagði mikla vinnu á sig varnarlega og sóknarlega og hélt boltanum vel fyrir okkur, passaði hann og það er mikilvægt," sagði Rúnar.

Daniels er 22 ára og lék á sínum tíma með U17 og U18 landsliðum Hollands. Verður hann áfram hjá Fram á næsta tímabili?

„Það verður bara skoðað eftir tímabilið, sjáum hvernig hann klárar þetta mót með okkur og hvar okkar vilji og hans liggur."

Brynjar Gauti Guðjónsson og Freyr Sigurðsson voru ekki með Fram í leiknum í gær vegna veikinda.

„Þeir koma til baka næst og svo vonandi kemur Tryggvi (Snær Geirsson) til baka. Svo sjáum við hvort Jannik (Pohl) treysti sér og sé nægilega góður til að taka þátt."