Real Mallorca er komið upp í 5. sæti spænsku deildarinnar eftir að hafa lagt Real Betis að velli, 2-1, með dramatísku sigurmarki í lok leiks.

Mallorca-liðið var að sækja þriðja sigur sinn á tímabilinu, en þetta er besta byrjun liðsins í tólf ár.

Það byrjaði þó ekkert sérstaklega vel. Argentínumaðurinn Giovani Lo Celso kom Betis yfir á 7. mínútu með föstu skoti fyrir utan teig og yfir markvörð Mallorca.

Forystan varði aðeins í 82 sekúndur en Dani Rodriguez jafnaði fyrir gestina eftir frábæran undirbúning Cyle Larin. Langur bolti kom fram á Larin, sem náði að taka hann niður og leggja boltann fyrir Rodriguez sem skoraði með laglegu innanfótarskoti.

Á lokasekúndum síðari hálfleiksins gerði Valery Fernandez sigurmark Mallorca eftir hornspyrnu. Boltinn fór í gegnum allan pakkann og á Fernandez sem setti þéttingsfast skot sitt í vinstra hornið.

Mallorca fer upp í 5. sæti deildarinnar með 11 stig, en Betis er í 11. sæti með 8 stig.