Vincent Kompany, þjálfari Bayern München í Þýskalandi, segir það ekki rétt að hann hafi tjáð Matthijs De Ligt að hann væri miðvörður númer eitt í liði Bayern, í tilraun sinni til að sannfæra Hollendinginn um að vera áfram í Þýskalandi.
Athletic sagði frá því á dögunum að Kompany hafi verið mótfallinn því að selja De Ligt frá félaginu.
Kom þar fram að Kompany hafði tjáð De Ligt að hann væri fyrsti kosturinn í miðvarðarstöðuna og væri ómissandi.
De Ligt ákvað að yfirgefa Bayern og fara til Manchester United þar sem hann hefur komið inn af bekknum í fyrstu tveimur deildarleikjunum, en Kompany þverneitar fyrir það að hafa sagt við De Ligt að hann væri fyrsti kostur í miðvarðarstöðuna.
„Ég sagði þetta aldrei. Það væri heimskulegt af mér að segja eitthvað í þá áttina. Það helst ekki í hendur við það sem við erum að plana að gera við hópinn,“ sagði Kompany.
Bayern er þunnskipað í vörninni. Hiroki Ito kom til félagsins í sumar en hann er að glíma við meiðsli og er því Bayern aðeins með Dayot Upamecano, Eric Dier og Kim-Min Jae klára til að spila.
Athugasemdir
