Nottingham Forest neitar að gefast upp á því að fá mexíkóska framherjann Santiago Gimenez frá Feyenoord en félagið lagði fram þriðja tilboðið í leikmanninn í gær.
Markamaskínan blómstraði undir stjórn Arne Slot hjá Feyenoord, en hann vann deildina á fyrsta tímabili sínu þar og bikarinn á síðasta tímabili Slot áður en sá hollenski tók við Liverpool.
Á þessum tveimur tímabilum skoraði hann 49 mörk í öllum keppnum og þá hefur hann byrjað nýja tímabilið frábærlega.
Í sumar var Gimenez orðaður við marga stóra klúbba og kemur því á óvart að Nottingham Forest sé í bílstjórasætinu.
Samkvæmt Fabrizio Romano er Gimenez opinn fyrir því að ganga í raðir Forest.
Feyenoord hefur hafnað tveimur tilboðum Forest en nú hefur enska félagið lagt fram þriðja boðið sem hljómar upp á tæpar 30 milljónir punda.
Ef Feyenoord samþykkir það verður þetta metsala hjá félaginu.
Athugasemdir
