Barnes snýr heim í Burnley (Staðfest) - Ætlar upp með liðinu í fjórða sinn

Sóknarmaðurinn reynslumikli Ashley Barnes er kominn aftur til Burnley en hann skrifaði undir samning út tímabilið, eftir að hafa losað sig frá Norwich.

Eins og fjölmiðladeild Burnley er þekkt fyrir þá var Barnes kynntur með skemmtilegu myndbandi, sem sjá má hér að neðan.

Barnes er 35 ára og spilaði áður með Burnley 2014-2023 en þá skoraði hann 67 mörk í 293 leikjum. Burnley vonar að reynsla hans komi sér vel í baráttunni um að komast aftur upp í ensku úrvalsdeildina. Liðið er sem stendur í öðru sæti Championship.

Barnes hefur þrisvar farið upp í ensku úrvalsdeildina með Burnley og vonast til að gera það í fjórða sinn. Hjá Norwich skoraði hann sjö mörk í 49 leikjum en hann gekk í raðir félagsins 2023.

„Það er mögnuð tilfinning að vera kominn aftur heim!" segir Barnes sem gæti spilað í grannaslag gegn Blackburn Rovers á morgun.