Fram kom í auglýsingu frá Víkingi í gær að HúbbaBúbba myndi koma fram á skemmtun fyrir bikarúrslitaleik Víkinga og KA. Vakti þetta undrun KR-inga á samfélagsmiðlum og skrifaði Björn Þorláksson meðal annars færslu á X þar sem hann deildi auglýsingunni og skrifaði: „Hvað segirðu, hverjir taka lagið?"

Skömmu seinna var auglýsingunni breytt og HúbbaBúbba tekið af dagskrá.

Eyþór ræddi við Vísi um málið og sagði það aldrei hafa verið staðfest að hann myndi koma fram í Víkinni, hann hefði engan áhuga á því. „Ég er fyrst og fremst KR-ingur, svo það eina sem ég spila í Víkinni er fótbolti. Ég er ekki að fara að taka lagið þarna. Það er bara svoleiðis," sagði Eyþór.

„Það var búið að hafa samband við mig varðandi að taka lagið þarna en á endanum taldi ég það ekki við hæfi."

Hann segir jafnframt að hann hafi ekkert verið búinn að ræða við Óskar Hrafn Þorvaldsson, þjálfara KR, um þetta. Hann hafi sjálfur ekki talið þetta við hæfi en KR spilar fallbaráttuslag við Vestra daginn eftir bikarúrslitaleikinn.

Menn séu mjög pirraðir
Rætt var um það í Innkastinu fyrr í vikunni að það væru slúðursögur úr Vesturbænum að KR-ingar væru ósáttir við Eyþór sem er mjög áberandi á TikTok á öðrum samfélagsmiðlum. Á meðan hafi hann skilað litlu inn á vellinum í sumar, hann hafi aðeins skorað eitt mark í 18 deildarleikjum í sumar.

„Leigubílasögur úr Vesturbænum, þetta eru slúðursögur, um að menn séu mjög pirraðir á Eyþóri Wöhler. Hann var ónotaður varamaður í gær og hefur ekki komið með neitt að borðinu inn á vellinum. Á meðan er hann út um allt á samfélagsmiðlum," sagði Elvar Geir Magnússon í Innkastinu.

„Þegar Skaginn fellur, þá var hann frábær. Þetta var senter sem maður hefði drepið fyrir að hafa í liðinu sínu. Svo fer hann í Breiðablik og það var aldrei að fara að virka. Síðan þá hefur hann bara verið týndur. Ég held að hann geti verið fínasti leikmaður, en kannski ekki í toppliði," sagði Valur Gunnarsson í þættinum.

Eyþór svaraði fyrir þetta í viðtalinu við Vísi. „Þegar allt kemur til alls er fótboltinn og félagið númer 1, 2 og 3. Vissulega er þetta ákveðið púsluspil á köflum en knattspyrnan gengur ávallt fyrir," sagði Eyþór.

Hægt er að hlusta á Innkastið í heild sinni í spilaranum hér fyrir neðan.