Steve Bruce, fyrrum fyrirliði Manchester United og núverandi þjálfari Blackpool í League One, verður ekki á hliðarlínunni gegn Barnsley um helgina eftir sorglegt andlát barnabarns hans.
Barnabarnið var aðeins fjögurra mánaða gamalt og kemur andlátið fjölskyldunni gríðarlega á óvart.
Alex Bruce, sonur Steve, verður heldur ekki með Salford City um helgina en hann er partur af þjálfarateymi félagsins, sem leikur í League Two.
Fyrrum fótboltamaðurinn Matt Smith, sem lék meðal annars fyrir Leeds, Fulham, QPR, Millwall og Salford áður en hann lagði skóna á hilluna í sumar, er tengdasonur Steve Bruce og faðir barnsins.
Hinn 63 ára gamli Bruce, sem hefur meðal annars þjálfað Aston Villa og Newcastle United á löngum ferli, tók við Blackpool í september eftir að hafa verið án starfs í tæplega tvö ár. Hann hefur farið vel af stað við stjórnvölinn þar.
Athugasemdir