Richarlison og Heung-Min Son eru báðir leikfærir og geta því verið með þegar Tottenham mætir West Ham United í ensku úrvalsdeildinni klukkan 11:30 í dag.
Son, fyrirliði Tottenham, hefur misst af síðustu tveimur leikjum vegna meiðsla aftan í læri.
Hann hafði skorað tvö og gefið tvær stoðsendingar áður en hann meiddist en það eru frábærar fréttir fyrir Tottenham að hann sé klár í slaginn gegn West Ham.
Brasilíski sóknarmaðurinn Richarlison er einnig orðinn leikfær en hann hefur ekki spilað síðan í lok ágúst.
Richarlison er samtals með 25 mínútur spilaðar á tímabilinu en hann verður einnig til taks fyrir leikinn gegn West Ham. Þetta staðfesti Ange Postecoglou, stjóri Tottenham, á blaðamannafundinum í gær.
Tottenham þarf verulega á þessum tveimur að halda en liðið hefur aðeins náð í tíu stig úr sjö deildarleikjum.
Athugasemdir