Þýska stórveldið Bayern München sýndi Glasner áhuga eftir innkomu hans hjá Palace og var tilbúið að borga 18 milljónir evra til að leysa hann undan samningi. Palace sendi móttilboð upp á 100 milljónir evra. Svo mikils mátu þeir Austurríkismanninn sem hafði áður stýrt Eintracht Frankfurt til sigurs í Evrópudeildinni.

Núna hins vegar, þá hangir starf Glasner á bláþræði. Hann er einn af líklegustu stjórunum í ensku deildinni til að missa starf sitt.

Palace tapaði 1-0 gegn Nottingham Forest í gær eftir mistök markvarðarins Dean Henderson.

„Oliver veit það að ef þú vinnur ekki leiki, þá eru góðar líkur á því að síminn þinn muni hringja. Það eru eigendurnir og þú ert látinn taka pokann þinn. Það er hluti af leiknum og hann veit það. Gengið hefur verið hræðilegt," sagði Tim Sherwood, fyrrum stjóri Aston Villa og Tottenham, eftir leikinn í gær.

„Þeir sakna leikmanna frá síðasta tímabili en það sem þá skortir aðallega er trú. Það er orðinn vani hjá þeim að tapa fótboltaleikjum."

Michael Olise er leikmaður sem Palace saknar mikið en hann gekk í raðir Bayern München síðasta sumar. Leikmenn eins og Adam Wharton, Ebere Eze og Jean-Philippe Mateta hafa þá ekki verið næstum því eins góðir og þeir voru á síðasta tímabili.