Kristian Nökkvi Hlynsson lék allan leikinn er Jong Ajax, unglinga- og varalið Ajax, gerði jafntefli við Venlo í hollensku B-deildinni.
Heimamenn í Amsterdam voru betri í fyrri hálfleik en gestirnir tóku forystuna gegn gangi leiksins. Danski táningurinn Christian Rasmussen jafnaði þó tveimur mínútum síðar og var staðan 1-1 í leikhlé.
Síðari hálfleikurinn var jafnari. Hann var tíðindalítill og voru fleiri mörk ekki skoruð. Jong Ajax er með 16 stig eftir 12 umferðir á meðan Venlo er með 18 stig og situr í umspilssæti.
Kristófer Ingi Kristinsson var ónotaður varamaður hjá Venlo.
Jong Ajax 1 - 1 Venlo
Guðmundur Þórarinsson var þá í byrjunarliðinu hjá OFI Crete sem gerði markalaust jafntefli við Lamia í gríska boltanum.
Gummi spilaði fyrstu 68 mínúturnar í vinstri bakverði og var þetta hans annar byrjunarliðsleikur í röð.
OFI Crete hefur farið illa af stað í haust og er aðeins með 6 stig eftir 9 umferðir.
Hörður Björgvin Magnússon og félagar í Panathinaikos eru á toppi deildarinnar með fullt hús stiga eftir níu umferðir. Þeir unnu 1-0 gegn Aris í gær með sigurmarki í uppbótartíma.
Hörður Björgvin lék allan leikinn í hjarta varnarinnar og er að festa sig í sessi í byrjunarliðinu.
Sverrir Ingi Ingason lék að lokum allan leikinn þegar PAOK lenti tveimur mörkum undir gegn Asteras Tripolis á sínum eigin heimavelli.
PAOK náði þó að koma til baka og urðu lokatölur 2-2. PAOK hefur farið hægt af stað miðað við sín viðmið og er í fimmta sæti, með 16 stig eftir 9 umferðir.
OFI Crete 0 - 0 Lamia
Panathinaikos 1 - 0 Aris Thessaloniki
PAOK 2 - 2 Asteras Tripolis
