Framherjinn samdi við Stockport um áramótin eftir að hafa slegið markametið í efstu deild með KR-ingum á síðustu leiktíð.

Eins og með alla leikmenn þá þurfti hann aðlögunartíma en hann var að spila sinn þriðja leik með félaginu í dag.

Benoný kom inn af bekknum í hálfleik er Stockport var marki undir og gerði hann sér lítið fyrir og skoraði tvö mörk og tryggði liðinu sigurinn.

Hann jafnaði strax á 47. mínútu eftir sendingu Tanto Olaofe. Benoný fékk boltann og setti hann af öryggi í netið sem var hans fyrsta mark fyrir félagið.

Tíu mínútum fyrir leikslok stangaði hann fyrirgjöf í netið og sótti öll þrjú stigin fyrir Stockport. Ótrúleg innkoma hjá Benoný og munu þessi mörk vafalaust gefa honum mikið fyrir lokakafla tímabilsins.

Stockport er í 4. sæti C-deildarinnar með 60 stig þegar tólf leikir eru eftir af deildinni.

Jón Daði Böðvarsson var ekki í leikmannahópi Burton sem gerði 1-1 jafntefli við Mansfield og þá var Willum Þór Willumsson í byrjunarliði Birmingham City sem vann 1-0 sigur á Wycombe Wanderers í titilbaráttuslag.

Alfons Sampsted var ónotaður varamaður en Birmingham er áfram á toppnum með 76 stig, nú tólf stigum meira en Wycombe og útlit fyrir að Birmingham sé á leið í B-deildinni.

Jason Daði Svanþórsson var þá á sínum stað í byrjunarliði Grimsby Town sem gerði 1-1 jafntefli við Cheltenham. Grimsby er í 8. sæti ensku D-deildarinnar með 52 stig.