Manchester United hefur tjáð ítalska félaginu Napoli að það ætli sér að virkja kaupákvæði í samningi nígeríska framherjans Victor Osimhen í sumar en þetta segir tyrkneski blaðamaðurinn Yagiz Sabuncuoglu.
Osimhen verður einn heitasti biti sumarsins en hann er þessa stundina á láni hjá Galatasaray í Tyrklandi og verið að raða inn mörkunum.
Hann hefur skorað 22 mörk í 28 leikjum en ljóst er að þetta verður hans eina leiktíð í Tyrklandi.
Sabuncuoglu, sem er með 1,7 milljónir fylgjenda á X, segir að Man Utd sé að leiða kapphlaupið, en félagið á að hafa tjáð Napoli að það ætli sér að greiða klásúluverð hans í sumar.
Ákvæðið nemur um 60 milljónum punda og gæti þá sloppið við viðræður við Napoli, enda hefur Aurelio De Laurentiis, forseti Napoli, verið þekktur fyrir að vera erfiður í viðræðum.
Man Utd er í leit að markamaskínu en það hefur lítið verið að ganga fram á við undanfarið. Rasmus Höjlund og Joshua Zirkzee hafa samtals skorað fimm deildarmörk á tímabilinu á annars mjög dapri leiktíð liðsins.
Athugasemdir
