Dagur Dan fer vel af stað á tímabilinu
Dagur Dan Þórhallsson var á skotskónum í 2. umferð MLS-deildarinnar með Orlando City í nótt.
Bakvörðurinn var einn af bestu varnarmönnum deildarinnar á síðustu leiktíð.
Hann var einn af nokkrum leikmönnum sem voru tilnefndir til verðlauna sem besti varnarmaður ársins.
Orlando komst alla leið í úrslitaleik Austur-deildarinnar en tapaði þar fyrir New York Red Bulls.
Dagur byrjaði inn á í fyrstu umferðinni í 2-4 tapi gegn Philadelphia Union en þurfti að sætta sig við að byrja á bekknum í nótt. Hann nýtti mínúturnar vel því hann kom inná á 80. mínútu og skoraði mínútu síðar.
Hann skoraði fjórða og síðasta mark liðsins í 4-2 sigri á Toronto eftir frábært hlaup inn í teiginn og var afgreiðslan síðan í hæsta klassa með innanfótarskoti í vinstra hornið.
Til gamans má geta að Alex Freeman, sem gerði annað mark Orlando í leiknum, er sonur fyrrum NFL-stjörnunnar Antonio Freeman sem vann Ofurskálina með Green Bay Packers árið 1997.
Orlando er komið með þrjú stig úr fyrstu tveimur leikjunum á tímabilinu en liðið mætir næst New York City FC. Sá leikur er spilaður 9. mars.
Thorhallsson with the confident finish to extend the @OrlandoCitySC lead! pic.twitter.com/Zx2KL1FSJZ
— Major League Soccer (@MLS) March 2, 2025
Athugasemdir
