Franska stórliðið Paris Saint-Germain vann sannfærandi 4-1 sigur á Lille í frönsku deildinni í kvöld en byrjunarlið Lille vakti mikla athygli.
Jonathan David og Hákon Arnar Haraldsson voru báðir á bekknum hjá Lille. Þeir tveir leikmenn sem hafa verið hvað öflugastir í liðinu undanfarið.
Það var bara í síðasta leik sem Hákon skoraði tvö mörk gegn Mónakó og þá var David með 12 mörk í deildinni fyrir leikinn.
PSG hamraði Lille í fyrri hálfleiknum með fjórum mörkum. Bradley Barcola, Marquinhos, Ousmane Dembele og Desire Doue skoruðu mörkin.
Hákon og David komu inn í síðari hálfleik og skoraði David einmitt eina mark Lille þegar tíu mínútur voru eftir.
Þjálfarinn hefur greinilega verið farinn að hugsa um leikinn gegn Borussia Dortmund í 16-liða úrslitum Meistaradeildarinnar en sá leikur er á þriðjudag í Dortmund.
PSG er áfram á toppnum í frönsku deildinni með 61 stig og komið langleiðina með að vinna enn einn titilinn en Lille í 5. sæti með 41 stig.
Athugasemdir
