Danilo, fyrirliði Juventus á Ítalíu, er ekki lengur í myndinni hjá félaginu sem vinnur nú hörðum höndum að því að losa sig við leikmanninn.
Brasilíumaðurinn hefur verið á mála hjá Juventus frá 2019 og verið fyrirliði þess síðan Giorgio Chiellini yfirgaf félagið fyrir rúmum tveimur árum síðan.
Hann hefur spilað yfir 200 leiki fyrir Juventus á þessum tíma og kemur því verulega á óvart að Juventus skuli koma svona fram við leikmann sem hefur reynst liðinu mikilvægur, svo mikilvægur að hann var gerður að fyrirliða.
Samkvæmt Fabrizio Romano er Danilo ekki lengur í áætlunum Thiago Motta og félagsins og hefur nú íþróttastjóri félagsins staðfest að það sé að reyna að losa sig við hann.
„Við erum að vinna í því að selja Danilo í þessum mánuði. Það er planið. Við erum að reyna finna bestu lausnina fyrir Juventus og leikmanninn,“ sagði Cristiano Giuntoli, íþróttastjóri Juventus í viðtali við ítalska miðla.
Samkvæmt miðlunum á Ítalíu er líklegast að hann fari til Antonio Conte og félaga í Napoli en Sádi-Arabía kemur einnig til greina.
Athugasemdir
