Gift Orban í leik gegn Blikum
Þýska félagið Hoffenheim er að ganga frá viðræðum við Lyon um kaup á nígeríska sóknarmanninum Gift Orban.
Orban er 22 ára gamall leikmaður sem hefur verið iðinn við kolann síðustu ár.
Hann skoraði meðal annars fjögur mörk í tveimur leikjum með Gent gegn Breiðabliki í riðlakeppni Sambandsdeildar Evrópu á síðasta tímabili, en hann hefur samtals skorað þrjár þrennur í keppninni.
Franska félagið Lyon fékk hann frá Gent fyrir ári síðan en það gekk erfiðlega að aðlagast franska boltanum.
Snemma á þessu tímabili kom hann inn af bekknum hjá Lyon gegn Strasbourg og skoraði tvö mörk á níu mínútum sem tryggði sigurinn.
Hann fékk tækifæri í næstu leikjum á eftir en tókst ekki að skora og er ekki lengur í myndinni hjá Lyon.
Franska félagið er að selja Orban til Hoffenheim í Þýskalandi og mun Lyon fá stærstan hluta af kaupverðinu sem það greiddi fyrir hann eða um 10 milljónir evra, en hann kostaði 14 milljónir fyrir ári síðan.
Athugasemdir
