Shahab Zahedi Tabar fagnar marki með ÍBV.
Shahab Zahedi Tabar, framherji Olimpik Donetsk, er markahæsti leikmaðurinn í úrvalsdeildinni í Úkraínu eftir ellefu umferðir en hann hefur skorað átta mörk líkt og Viktor Tsygankov, leikmaður Dynamo Kiev.
Hinn 25 ára gamli Shaha skoraði átta mörk í 23 leikjum með ÍBV í Pepsi-deildinni árin 2017 og 2018 en hann kom til Vestmannaeyja frá heimalandinu Íran.
Shahab sleit krossband árið 2018 en hann samdi við Suwon Samsung Bluewings í Suður-Kóreu í janúar 2019.
Dvöl hans þar var stutt því degi eftir að Shahab skrifaði undir rifti Suwon samningi hans. Ástæðan var sú að fréttir rötuðu í fjölmiðla í Suður-Kóreu um að Shahab hafi á yngri árum tekið út tveggja ára keppnisbann eftir að hafa fallið á lyfjaprófi.
Stuðningsmenn Suwon urðu mjög reiðir eftir þessar fréttir og félagið ákvað að semja um starfslok við Shahab.
Shahab var félagslaus þangað til ágúst í fyrra þegar hann samdi við Olimipik Donetsk. Þar sló hann í gegn á síðasta tímabili og var valinn besti leikmaður liðsins.
Á þessu tímabili hefur Shahab raðað inn mörkum og fjölmiðlar í Úkraínu hafa undanfarið orðað hann við stórveldið Dynamo Kiev sem situr á toppnum þar í landi í augnablikinu.
Athugasemdir
