Það eru nokkrir Íslendingar sem verða í eldlínunni í kvöld og þá mætir enska stórveldið Chelsea einnig til leiks.

Byrjunarliðin má sjá hér fyrir neðan þar sem Albert Guðmundsson er í liði Fiorentina sem heimsækir Vitoria Guimaraes til Portúgal á meðan Andri Lucas Guðjohnsen er í fremstu víglínu hjá Gent á útivelli gegn Larne.

Fiorentina nægir stig til að tryggja sig beint áfram í 16-liða úrslit Sambandsdeildarinnar á meðan Andri og félagar í Gent eru öruggir áfram í umspilsleik um sæti í 16-liða úrslitum. Gent þarf sigur í Norður-Írlandi í kvöld til að eiga möguleika á að komast beint í 16-liða úrslitin og sleppa þannig við umspilsleik.

Sverrir Ingi Ingason er í byrjunarliði Panathinaikos á heimavelli gegn Dinamo Minsk, en Panathinaikos getur tryggt sér umspilsleik með sigri í kvöld alveg eins og Víkingur R.

Þá er Guðmundur Þórarinsson á varamannabekknum hjá armenska félaginu FC Noah. Noah heimsækir TSC til Serbíu í lokaumferðinni og á möguleika á umspilsleik með sigri. Rúnar Alex Rúnarsson er einnig á bekknum hjá FC Kaupmannahöfn. FCK nægir eitt stig til á útivelli gegn Rapid Vienna að tryggja sér umspilsleik.

Að lokum mætir Chelsea með tilraunakennt byrjunarlið á heimavelli gegn Shamrock Rovers frá Írlandi. Chelsea er með fullt hús stiga fyrir viðureignina og verður áhugavert að sjá hvort Shamrock, sem hefur verið að gera furðu gott mót, takist að stríða varaliðinu hans Enzo Maresca.

Fiorentina: Terracciano, Dodo, Martinez Quarta, Comuzzo, Parisi, Richardson, Mandragora, Albert Guðmundsson, Ikone, Kouame, Beltran

Gent: Roef, Araujo, Brown, De Vlieger, Watanabe, Gandelman, Surdez, Ito, Kums, Mitrovic, Andri Lucas

Panathinaikos: Lodygin, Jedvaj, Sverrir Ingi, Kotsiras, Max, Maksimovic, Arao, Ounahi, Tete, Djuricic, Jeremejeff

Chelsea: Jorgensen, Disasi, Acheampong, Veiga, Cucurella, George, Casadei, Dewsbury-Hall, Nkunku, Madueke, Guiu