Fanndís lék ekkert með í sumar er Valur varð Íslands- og bikarmeistari þar sem hún sleit krossband undir lok síðasta árs.

„Fótbolta hjartað er í í 1000 molum; krossbandið slitið, langt og strangt ferli framundan," skrifaði Fanndís við færslu á Instagram þegar hún tilkynnti að krossbandið væri slitið.

Í sumar kom það svo í ljós að hún og Eyjólfur Héðinsson, fyrrum landsliðsmaður í fótbolta, ættu von á sínu öðru barni.

Hún segir í samtali við Fótbolta.net að planið sé að spila með Val næsta sumar þegar hún er búin að jafna sig á krossbandaslitunum og barneign.

Fanndís, sem er samningsbundin Val út næstu leiktíð, lék tólf leiki með Hlíðarendafélaginu á síðasta ári og skoraði fjögur mörk. Hún á að baki 109 A-landsleiki fyrir Ísland og hefur hún skorað í þeim 17 mörk.