Landsliðsmaðurinn hefur farið ágætlega af stað með liði sínu, en hann var í byrjunarliðinu í dag.

Spænski vængmaðurinn Cristian Tello skoraði eina mark leiksins í uppbótartíma fyrri hálfleiks og þar við sat.

Jóhann Berg fór af velli þegar lítið var eftir af leiknum en Al Orobah er með 7 stig eftir fimm leiki og situr í 9. sæti deildarinnar.

Hjörtur Hermannsson byrjaði í hjarta varnarinnar hjá Carrarese sem gerði markalaust jafntefli við Reggiana í ítölsku B-deildinni. Hjörtur fór af velli þegar tæpur hálftími var eftir af leiknum en Carrarese er með fjögur stig á botninum eftir sjö umferðir.

Cole Campbell lék þá í 2-1 tapi varaliðs Borussia Dortmund gegn 1860 München í þýsku C-deildinni. Hann lék síðustu tuttugu mínútur leiksins, en Dortmund er í 13. sæti með 8 stig eftir átta leiki.

Anton Logi Lúðvíksson kom inn á undir lok leiks í 1-0 tapi Haugesund gegn Brann í norsku úrvalsdeildinni. Haugesund er í 13. sæti með 23 stig.

Valgeir Valgeirsson spilaði allan leikinn í mögnuðum 1-0 sigri á toppbaráttuliði Landskrona í sænsku B-deildinni. Örebro hefur ekki tapað í síðustu þremur leikjum og er nú í 9. sæti með 31 stig og í góðri stöðu um að halda sér uppi.