Barcelona tapaði óvænt fyrir Osasuna, 4-2, í Pamplona í La Liga í kvöld.

Hansi Flick, þjálfari Börsunga, var djarfur í liðsvali sínu með því að byrja með Lamine Yamal og Raphinha á bekknum, tvo af bestu leikmönnum liðsins á leiktíðinni.

Þá var Flick neyddur til þess að hafa Inaki Pena, varamarkvörð liðsins, í markinu, en hann er að spila í stað Marc-andre ter Stegen sem verður frá út tímabilið eftir að hafa slitið krossband.

Ante Budimir og Bryan Zaragoza skoruðu tvö mörk á tíu mínútum í fyrri hálfleik. Budimir skoraði eftir fyrirgjöf Zaragoza á 18. mínútu og skoraði Zaragoza annað markið á 28. mínútu er hann fékk sendingu í gegn, fór framhjá Pena í markinu og skoraði.

Pau Victor minnkaði muninn snemma í síðari hálfleik og nokkrum mínútum síðar komu þeir Yamal og Raphinha inn á.

Budimir bætti við þriðja marki Osasuna úr vítaspyrnu á 72. mínútu eftir að Nico Dominguez braut af sér í teignum. Abel Bretones gerði fjórða markið með laglegu skoti fyrir utan teig þegar fimm mínútur voru eftir af venjulegum leiktíma.

Spænska undrabarnið Yamal minnkaði muninn fyrir Barcelona með stórkostlegu marki á lokamínútunum. Hann fékk boltann rétt fyrir utan teig og hamraði honum í samskeytin hægra megin.

Barcelona er á toppnum með 21 stig, en gaf þarna erkifjendum sínum í Real Madrid möguleika á því að komast nær, en fjögur stig skilja liðin að. Osasuna er í 6. sæti með 14 stig.